БАХАНА

юум. н. 1) газарта зоогдоһон гү, али газарта тодхоогдоһон бүдүүн ута модон, шулуун, түмэр тулгуури (столб, подпорка): Сарайн шатахада үлэһэн нэгэ бахана, нээрээшье, талмай дээрэ зорюута бэлэдхэгдэһэндэл ёдойжо байһан юм (Б. Санжин, Б. Дандарон); Бай байһаар байжа, бахана болон зогсобо (Оньһ. ү.); баханын һамган болгохо ёһо басаганайнгаа гэртээ хүгшэрхэдэ, эхэ эсэгэнь «үнгынь хубилгаха» гээд, найман үһыень задалжа, һамган янзаар хоёр болгоод, туйба зүүдэг, һамган дэгэл, уужа үмэдхүүлдэг байгаа. Хорон хэлэтэйшүүл иимэ һамгад тухай «баханын һамган» гэлсэгшэ һэн. Гэртээ хүгшэрхэдѳѳ, үһэеэ хахалһан иимэ эхэнэрнүүд аханар, дүүнэрэйнгээ үхибүүе үргэн абажа, үтэлхэ наһандаа үргүүлхэ үритэй болодог һэн (Л. Линховоин) (обряд «выдачи замуж за столб»): – Зай, тиигээ һаа харыш даа, шамайгаа иигээд баханын һамган болгоходоо баһа заһал түхеэрхэбди (Б. Санжин, Б. Дандарон); 2) баруун бур. харшын хүндэлэн модо һуулгахаар хоёр тээһээнь аматуулһан холбоотой модон (столб с продольными пазами); 3) байшан ордонуудай элдэбээр шэмэглэгдэһэн гоёолто тулгуури (колонна).