АМАРХА

үйлэ ү. эсэбэриеэ тарааха, бэе махабадаа тэниилгэхэ, хэжэ байhан юумэеэ ойро зуура хэнгүй байха (отдыхать): Бүхы бэень энээхэн үедэ амаржа хүсэ нэмээд hэргэхээ байhан хэбэртэй (Д. Эрдынеев); амарад гэхэ байд гэхэ, зогсолто хэхэ (передохнуть): Тэдэнэр нэгэ бага амарад гээд, баруун гар тээшээ мушхажа, ехэ горхонойнгоо эрьеэр үгсэбэ (Б. Мунгонов); амаран татаха бага зэргэ байжа бэеэ тэниилгэхэ, удаан бэшэ зогсолто хэхэ (немного отдохнуть, передохнуть): Тиигээд холын аяншад халта амаран татаад, саашаа гэшхүүлээ hэн (Д. Батожабай); амарха эрхэ жэлэй арбан нэгэн hара хүдэлѳѳд, hара, hараhаа үлүүшье амардаг ёhо (право на отдых): Базаржабтан энэ жэлэйнгээ амарха эрхэ хэрэглэжэ, хилын саагуур аяншалгада ошобо; hанаагаа (гү, али сэдьхэлээ) амарха сэдьхэл амгалан болохо, hанаагаа дүүрэхэ, ан-бун болохо (успокаиваться): Тэрэ үерэй татажа байhые мэдэhэн тула hанаагаа амарhан янзатай (Ц.-Ж. Жимбиев).