АДАР

тэмд. н. 1) асари томо, данхагар, дархагар, дарьягар, хүжүүн (огромный, громоздкий; грузный, неуклюжий): Аяар холо уняартаһан / Адар заводой утаае, / Гүлгэлжэ байһан таримал мододые, / Гүлмэр сэдьхэлдээ шэнгээнэб (Д. Улзытуев); адар томо (гү, али ехэ) асари, асари томо, барьягар (огромный, громадный): Эсэгэһээнь үлэһэн адар томо ханзын али нэгэ буланда хэды мүнгэнэй дараатай байһые бү мэдэе (С. Цырендоржиев); Бадан Абжаа-удаган хоёр нүхэдэйнгѳѳ урда зогсоод, Головинай ороһон адар ехэ үүдэн тээшэ шэртэнэ (Б. Санжин, Б. Дандарон); адар хүндэ угаа хүндэ, лайд (тяжёлый, увесистый): Газаагаа, сарай дороо, айхабтар мохоо, адар хүндэ гар тээрмэтэй (Ч. Цыдендамбаев); адар хүндэ бэетэй нүһэр хүндэ, болхи (грузный): Иигэжэ адар хүндэ бэетэй, ужаг удаан зантай Федор Дамбаевич Надмитов томо, баян колхозойнгоо түрүүлэгшын шэрээдэ һуугаа бэлэй (Б. Мунгонов); 2) таагүй, ядалдамаар, бэрхэшээлтэй, һаадтай (неудобный, затруднительный).