ААШАЛХА

үйлэ ү. элдэбээ гараха, бузгайрха, аяглаха (безобразничать, дурачиться): Эмниг боро улам бүри аашалан, үбдэгсѳѳ хүнгэрэг соо орон дэбхэржэ, һүрэжэ, харайжа байна (Ц.-Ж. Жимбиев); зоргоороо аашалха ѳѳрѳѳ мэдээд юумэ хэхэ, замбуурха, бүдүүлиг галзуугаар ябаха (самовольничать, бесчинствовать): Энэ мэтээр зоргоороо аашалжа, һүзэгшэ зониие мэхэлжэ, хууража ябаһан Дардай хуулиин зэргээр гэмээ амсаһан намтартай юм (М. Осодоев); элдэбээр аашалха олигой муухай юумэ хэхэ, бузгайрха (безобразничать): Харин мэхэ гохо гаргажа, элдэбээр аашалжа, нүхэр һүүдэрээшье һаань худалдажа байгаад, амиды ябахаа оролдохогүйб (С. Ангабаев).