ҮҮСХЭЛ

юум. н. эхилэл, эдэбхи, һанаашалга, үүдхэл (почин, инициатива): Сугларагша хүбүүд даргынгаа хэлэһэн дуулдаагүй һонин шэнэ үүсхэл тухай үгыень дотороо шэнжэлэн үзэжэ, бодолгото болон, удаахан абяагүй һууна ха (С. Норжимаев); үүсхэл эдэбхи эхилэл, һанаашалга, зоригтой эрмэлзэл (дерзание): – Хүндэтэ нүхэд, арадай үүсхэл эдэбхи гэжэ айхабтар ехэ дабшуулагша хүсэн бии ха юм даа (Б. Мунгонов); үнэтэ үүсхэл шухала эдэбхи (ценный почин); үүсхэл гаргаха эдэбхи гаргаха, ямар нэгэн юумэндэ эдэбхитэйгээр оролсохо, һанаашалга гаргаха (проявлять инициативу): Энэ ажалда түрүүн үүсхэл гаргажа эмхидхэһэн хүниие та өөрөө олоогүй буруу ойлгожо байна гээшэт (Х. Намсараев); үүсхэл гаргадаг бүлэг ямар нэгэн юумэ хамтадаа зохёожо байгуулдаг бүлэг зон (инициативная группа); өөрынгөө үүсхэлээр өөрынгөө шиидхэбэреэр, һанаагаараа (по собственной инициативе): Зүгөөр энэ аяншалгые Георгий Николаевич өөрынгөө үүсхэлээр эмхидхээ гэжэ һанаха байнаб (Б. Мунгонов); ○ эдэбхи гэжэ үгэтэй парн. хэрэгл.