УРДАХИ

тэмд. н. 1) үбэр зүгтэхи (южный): Хойто хүршынь аяга талха барижа ерээ һаа, урдахи хүршэнь улхан дүүрэн зөөхэй асардаг (Ч. Цыдендамбаев); 2) ямар нэгэн хүнэй гү, али юумэнэй наанахи, үмэнэхи, наада таладахи, нюур таладахи (передний, находящийся перед чем-л.): Эдэ үгэнүүдэй һүүлээр үбгэ һамган хоёр урда урдаһаа харалсабагүй, урдахи аягатай сайнуудаа гэтэн, өөһэд өөһэдынгөө бодолдо бүри диилдэһэн шэнги болошобод (Д. Эрдынеев); гэрэй урдахи гэрэй наана байгааша (находящийся перед домом): Доржын хүршындөө хүрэжэ ерэхэдэ, гэрэйнь урдахи үнгэгдэһэн ногоон дээрэ, сагаан эшэгын тэг дунда, нютагай залуушуулаар хүреэлэгдэһэн нэгэ үбгэхэн һууна (Ч. Цыдендамбаев); урдахи гэрэл машинын нюур таладахи гэрэл (передние фары): Долгормаагай уһа шабар болошоһон урдахи гэрэлээрээ харахадань, тэрээн тээшэ Эржэни түргэхэн ерэжэ ябаба (А. Ангархаев); 3) урда тээнь болоһон, урда сагай (прежний): Харин урдахи буряадуудай һүүлшын удамаршан Шилдэй Занги байһан юм (Д. Эрдынеев); энээнһээ урдахи жэлнүүд һүүлшын хэдэн жэл (предыдущие годы): Энээнһээ урдахи жэлнүүдтэ апрелиин нэгэнээр лэ саһан хайлагша бэлэй (Ч. Цыдендамбаев).