УРДАХА

үйлэ ү. 1) уһанай гү, али ондоо шэнгэн бодосой ябаха, гоожохо (течь, протекать): Хабшал хүндые уруудаһан түргэн урадхалта, тунгалаг хүйтэн уһатай горхониинь мүнөөшье үбэлэй хүйтэндэ булигдангүй, зарим газартаа харзалан урдана (Б. Санжин, Б. Дандарон); 2) урадхал дээгүүр ябаха, урадхалда туугдаха (плавать): Хүн зоной, мүн дайдын амитадай талаантай зариманиинь модо юумэндэ аһалдажа, галзууран дошхорһон далай дээгүүр урдана, амияа абарна (Б. Мунгонов); 3) шэлж. үнгэрхэ, ябаха – саг тухай (проходить, протекать – о времени): Арай гэжэ золгоходонь, саг минута яаһан түргөөр урдажа арилнаб? (Ч. Цыдендамбаев); 4) шэлж. елэлзэн доошоо бууха, унаха, һолжорхо (струиться): Үдхэн хара үһэниинь тэрэнэй сулахан дала мүр, гарнууд дээгүүрнь урдана (Д. Эрдынеев).