УРБАЛДАХА

үйлэ ү. 1) хүмэрихэ, хүнтэрхэ, мухариха, ара гэдэргээ унаха (перевёртываться): Бүүбэй тогтохо юм бэшэ, Морхоо яахашье аргагүй хойшоо боло болоһоор, уһатай хонхосог уруу һархагад гээд урбалдашана (Ж. Балданжабон); урбалдан унаха хүмэрижэ унаха, тархяа уруу, табгайгаа өөдэ унаха (падать вверх тормашками): Жалуурай нюдөөр гал сахилан, арай шамай хүл дээрээ тогтожо ябаһан Жалуур урбалдан унаба (Ц. Шагжин); гэдэргээ урбалдажа унахаар барг. ехэ энеэдэтэй, тангайжа унахаар (очень смешной): Хадамдаа гараад, хүүни гэдэргээ урбалдажа унахаар фамилитай болоо; 2) досоохинь газаа тээшээ хараха (выворачиваться наизнанку).