УРАГШАТАЙ

1. тэмд. н. 1) бүтэмжэтэй, талаантай, амжалтатай, һайн (удачный, везучий, успешный): – Дааган буумни, улай ехэтэй, олзотой, урагшатай буумни буугай хайрсаг соо байна бэзэ? (С. Доржиев); урагшатай хүн талаантай хүн, золтой хүн (удачливый, везучий человек, везунчик): – Урагшатай хүн байба хаш, хэрэгшни абашагүй бэлэхэнээр бүтэшэбэ (Б. Мунгонов); урагшатай ажал амжалтатай, бүтэсэтэй, һайн үрэ дүнтэй ажал (успешная работа): Урагшатай ажалаймнай бата баримта юуб гэхэдэ, бидэнэр иимэ хүсэеэ зүбөөр сэгнэжэ, ажалаа оншотой ябуулаабди (Ц.-Д. Хамаев); 2. наречи 1) бүтэмжэтэйгөөр, амжалтатайгаар, талаантайгаар, азатайгаар (удачно, успешно): Агнууриингаа урагшатай эхилһэндэ баяртайнууд, халуун эльгэ хужарлан үмхөөд, хэрмэнүүдээ үбшөөд, унтаридаа оробобди (С. Цырендоржиев); урагшатай һайн (гү, али һайнаар) амжалтатайгаар, талаантайгаар (удачно, успешно): Хододоо урагшатай һайн, мүнгэн шэнги мүнхэ наһатай ябахынь түлөө иигэжэ бэлэглэдэг юм (М. Осодоев); Хэрэгээ урагшатай һайнаар бүтээһэндээ омогтой баяртай ябаһан агроном колхоздоо бусахаа яаража, үглөөгүүр эртэхэн бодоод, хотоһоо мордоһон байгаа (Ц. Дон); 2) түргөөр, шууд, бушуухан (быстро): Нима иимэл асуудал гараһай гэжэ хүлеэжэ байһандаа, ехэл урагшатай харюусаба (Ж. Тумунов).