УНХИДАХА

үйлэ ү. 1) үнэрдэхэ, шэншэхэ (нюхать, обнюхивать): Тэрэнэй үнэр улаашан үбгэн унхидаад үзэнэ: ехэл аятай зохид шэнги (Ж. Балданжабон); ◊ дариин үнэр унхидаха дайлалдаха, дайнда ябажа үзэхэ (воевать): Дариин үнэр унхидаагүй дворянинуудта, зарим нэгэ студентнэртэ сэмбээр хубсалхын орондо, хонин нэхы дэгэл хэдэрээ һаань… (Ч. Цыдендамбаев); 2) үнэр абаха, абяархаха, мэдэхэ (учуять, почуять): Үни хада орооһоной үнэр унхидаһан мориниинь тоогто дүтэлхэ тумаа хаядалаа бүри шангадхажа, урилдаанай хатарша мэтээр хүлнүүдээ хүнгэхэнөөр хаяна (М. Осодоев); 3) шэлж. һураглаха, һураг абаха, ойлгохо, мэдэхэ, мэдэрэн ойлгохо, гүйсэд ойлгохо (вынюхивать, пронюхивать): Залуушуулай хүхилдэжэ байһые унхидаһан Яабагшан һанаа амархан унтажа шадаагүй, хэлтэлзэһээр орожо ерэлэй (М. Осодоев).