УГААХА

үйлэ ү. 1) уһаар, уһан соо хэжэ сэбэр болгохо, уһаар зайлаха, уһан соо элдэб угаабариин бодос эдьхэжэ, тэрээн соогоо юумэ бажуужа, үнгэжэ, сэбэр болгохо (мыть, обмывать, стирать): Дармажабай морёо шүдэрлэжэ табяад, нюур гараа угаагаад ерэхэдэнь, түхэреэн столоо тойрожо, энэ тэрэ юумэ хөөрэлдэн һуужа эдеэлбэд (Б. Мунгонов); алтанай шорой угааха алтанай шорой уһанда тунаажа, хэрэггүй юумыень урадхуулха (промывать песок с золотом): Алтанай шоройе олон удаа угааха бүри, элдэб үлүү юумэнүүдынь уһанаар урдажа ошоод, гансал сула алтаниинь оёортонь үлэдэг ха юм (Ч. Цыдендамбаев); шабар угааха наяалдаһан шабарые уһаар арилгаха (смывать грязь): Гришин дүтэхэн байһан горхондо ошожо, ботинкынгаа шабар угааха, хубсаһаа арилгаха гэжэ захирба (Ж. Тумунов); 2) лама, бөөнэрэй заладаг аршаанаар бэеэ арюудхаха (обмывать аршаном, освящённой водой): – …энэ аршаан абаашажа, бэриеэ угаагты (Ч. Цыдендамбаев); 3) эдихэ, хэмхэрүүлхэ, нурааха (обваливать, обрушивать): – Уһанай угаадаг, хубилгадаггүй тиимэ һабатай гол горхон бии юм аал? (Ч. Цыдендамбаев).