УГАА

наречи тон, ехэ, маша, ушаргүй, уйгаргүй, айхабтар, аймшагтай (очень, весьма, чересчур, слишком): Ямар нэгэн угаа хүндэ юумэнһээ сүлөөрхэеэ шиидэһэндэл, хамаг нюусаяа энэ уулзалга дээрэ хэлэжэрхибэ ха юм (Д.-Д. Дугаров); угаа ехэ туһатай тон, маша туһатай (чрезвычайно полезный): Хүнгэн бэшэ багшын ажалда ханын һонин гаргаха, фотомонтаж, альбом гэхэ мэтэнүүд һуралсал хүмүүжүүлгын али олон хүдэлмэридэ угаа ехэ туһатай болодог һэн (Д. Дарижапова); угаа ехэ хүсэтэй айхабтар, уйгаргүй хүсэтэй (чрезвычайно мощный); угаа сүлөөгүй ехэ тухашаруу, айхабтар, ушаргүй сүлөөгүй (очень занятой); угаа аюултай айхабтар аюултай (очень опасный): Мүнөөнэй манай засаг зургаанай тогтооһоной ёһоор, дайсан байһан сэрэгүүдтэ туһалхань угаа аюултай юм (Басаа Валера); угаа баярлаха айхабтар ехээр, тэнгэридэ хүрэтэр, гэдэһэеэ хаха баярлаха (очень радоваться): Кузнецовой иигэжэ үнэн сэдьхэлһээ хөөрэхэдэ, үбгэн угаа баярлаба (А. Бальбуров); угаа һонирхолтойгоор хөөрэхэ ехэ һонирхол татуулжа хөөрэхэ (очень интересно рассказывать): Эрнест Кушнир маһагашан, хари гүрэнүүдээр ябаһан тухайгаа угаа һонирхолтойгоор хөөрэжэ оробо (С. Цырендоржиев); угаа гайхалтай ехэ, тон гайхалтай, гайхамаар (очень удивительный): – Угаашье гайхалтай. Али энэмнай хэжэг үбшэн гү? (Ч. Цыдендамбаев); угаа хара һүни тон харанхы һүни, нюдэ хадхама харанхы һүни (очень тёмная ночь); угаа һайхан айхабтар һайхан, аймшагтай гоё (весьма красивый): Гэртэнь угаа һайхан, һара нарандал адли сэбэр һамган байба (Арадай онтохонһоо); угаа хүйтэн тон хүйтэн, аймшагтай хүйтэн (очень холодный): Шамгүй энэ дэлхэй гансал тооhон. / Шамгүй энэ наран үгы. Хооhон. / Шамгүй энэ хабар угаа хүйтэн. / Минии наhан уйтан (Е. Борохитова); угаа (гү, али угай) ядахадаа яажашье һаань, ядахын сагта, тон ядабал (на худой конец, в крайнем случае, по крайней мере, хотя бы): Энэ залуу айлшанайнгаа мартахаар бэшэ ехэ туһа хэһыень бидэ хоёр хайшан гэжэ харюулха гээшэбибди, угаа ядахадаа Хэшэгтынгээ абаһан мүнгые түлэнгүй яаха һэнбибди даа (Х. Намсараев).