ТЭМТЭРХЭ

үйлэ ү. 1) харанхы соо гү, али юумэ харагдахагүй байдалда юумэ мүргэхэгүйн тула гараараа юумэ һабардан ябаха (брести на ощупь, идти, чуть не падая): Галдан газаашаа гарабаб гэхэдээ, бололгүй юумэнһээ торожо унаад, харанхыда тэмтэрэн саашалхадаа, малай хашаа соо ойлгомторгүй орошобо (Д. Сультимов); Тэмтэрһээр тээлниг соо тэбэнэ олохо (Оньһ. ү.); тэмтэрэд гэн ябаха а) харанхы соо гү, али юумэ харагдахагүй байдалда юумэ мүргэхэгүйн тула гараараа юумэ һабардан ябаха (идти на ощупь); б) найгарган ябаха (брести, качаясь); утаан соогуур тэмтэрхэ үдхэн утаан соо гараа урдаа баряад ябаха, юумэ һабардан урагшаа дабшаха (идти на ощупь в дыму): Газааһаа ороһон хүгшөөдэй ухаа мэдээ алдан, юу унтарааха яахаяашье ойлгожо ядан, үдхэн утаан соогуур тэмтэрбэ (Ц.-Ж. Жимбиев); хүлөөрөө тэмтэрхэ юушье харагдахагүйдэ хүлөөрөө урдань тэгшэ газар байна гү гэжэ үзөөд ябаха (идти, нащупывая дорогу ногой): Хүлөөрөө тэмтэрэн, харгынгаа далан алдахагүйе оролдоноб (С. Цырендоржиев); 2) найгаргаха, найгаха, хоёр тээшээ гуйбаха; ялхиргаха (шататься, брести шатаясь; ковылять): Һүүлээ хабшаад, харайлдажа ябаһан нохойнуудай нэгэниинь хэды дахин тэмтэрһээр, дороо хэбтэшэбэ (Д. Батожабай); 3) харагдахагүй газарта гараараа тудалдаһан юумэ бажуужа бэдэрхэ (шарить рукой): Үбгэн нилээд удаахан тэмтэржэ, унтариингаа саанаһаа нэгэ шэл гаргаба (Ч. Цыдендамбаев); 4) шэлж. яараха, шамдаха, мэгдэхэ (торопиться).