ТҮШЭГЛЭХЭ

үйлэ ү. 1) тулаха, унахагүйн тула хэрэглэхэ (опираться, использовать как опору): Гэнтэ иигэжэ һанахатайнь адли, һайн бууралынь, урдажа ябаһан нэгэ нүүлын хүндэлдөөд орхихотой сасуу, тэрээндэ түшэглэн, хэдэн удаа собхорон, гэнтэ нэгэ шулуун эрье өөдэ Цэрэнпилээ абаад, һүрэн гарашана (Х. Намсараев); 2) үндэһэлхэ, үндэһэн болгохо (опираться, использовать в качестве логического основания): Урда үедэ СССР гүрэнэй олон хэлэнүүдэй грамматиканууд ород хэлэнэй грамматикада түшэглэжэ бэшэгдэдэг байгаа (Н. Даржаева); мэлзэшэгүй баримтануудта түшэглэхэ арсашагүй баталалгануудта үндэһэлхэ (опираться на неопровержимые доказательства): Аймагай прокурор түрүүтэй шалгалтын комиссиин гэшүүд мэлзэшэгүй баримтануудта түшэглэн, тон шанга эрилтэнүүдые табиба (С. Цырендоржиев); 3) хүндэ гү, али юумээр туһалуулха, дэмжэгдэхэ (пользоваться поддержкой, помощью): Харин би үхи хүүгэдтэй болохо, энэ ажабайдалда түшэглэхэ эрэтэй, нүхэртэй болохо айхабтар һайхан, сэнхир һанаатайлби! (Ц. Цырендоржиев); 4) дотороо ямар нэгэн юумэнэй һайнаар бүтэхэ гэжэ хүсэхэ гү, али хүлеэхэ, найдални хүсэлдэхэ гэжэ этигэхэ, найдаха (полагаться, надеяться на кого-л.): Обкомдо хүдэлхэ болоод город ошохоёо байхадаа, тэрэниие намтай танилсуулжа, Агын зоной түшэглэхэ, урдаа хараха хүнүүдэй нэгэн гэжэ хэлэһыетнай мартадаггүйб (Д. Эрдынеев).