ТҮБЭД

, түгэд 1. юум. н. Хитад Арадай Уласай Түбэдэй автономито районой иргэн (тибетец): Баһа тиихэдэ мүнөөхи Зади-Ханда гэжэ басагандань баруун тээһээ ерэһэн түбэд юм гү, али монгол юм гү… (Х. Нам сараев); 2. тэмд. н. Хитад Арадай Уласай Түбэдэй автономито райондо хабаатай (тибетский): Тиибэшье зоной нюдэнһөө хашарһан янзатай, түбэд гуримаар үргэн шарф толгойдоо боожо, сасагыень хахад нюур дээгүүрээ һанжуулжархиба (Д. Батожабай); Үндэһэн буряад хэлэн дээрээ түгэд номой үгэнүүдые холисолдуулан гашай табиба (Ц. Шагжин); түбэд хэлэн түбэдэйхидэй хэлэдэг хэлэн (тибетский язык): Холын оронһоо ерэһэн Чойжоншо мүн лэ шанга шангаар түбэд хэлэн дээрэ дуугаржа байгаад, гурба дахин Аламжын толгой гараараа адислана (Д. Батожабай); түбэд эмнэлгэ ехэнхидээ ургамалаар бүридхэжэ хэһэн эмээр эмнэдэг аргын эрдэм (тибетская медицина): Мынцзикан гэжэ түбэд эмнэлгын һургуули дүүргэһэн эмшэд хадаа һудал, нюурай арһанай үнгэ, нюдэнэй янза, хэлэнэй үнгэр – эдэниие шудалжа гарадаг байгаа (Д. Батожабай).