ТӨӨ I

юум. н. 1) дэлигдээд байһан эрхы ба дунда хурган хоёрой хоорондохи зай, буряад арадай хуушанай ута үргэнэй хэмжүүр (пядь, расстояние между концами вытянутых большого и среднего пальцев): Худа худагы хоёрни ехэ хүбүүн Мантахайнгаа гэрэй буухада, төө халюутай, түхэреэн хээтэй, хахинама хүхинэмэ, һарьмай һаари шэнги торго магнал үмдэһэн юм гэлсэгшэ (Х. Намсараев); Түлгын арһан төө зузаан болог, / Түрэһэн гараһан мянган болог (Үреэлһээ); төө зайгүй төө хүрэхэ зайгүй (нет и пяди места); мухар төө эрхы болон нугалһан дунда хурганай хоорондохи зай (расстояние между большим и средним пальцем с подогнутыми двумя суставами последнего): Дэгэлэйнгээ хормойн утые дүрбэн төө, нэгэ мухар төөгөөр абахаар ха; төө тарганһаа толгой мэндэнь дээрэ (Оньһ. ү.) үлүү тарган байнхаар, элүүр энхэ байһаниинь дээрэ (≈ не до жиру, быть бы живу).