ҮЗЭМЖЭ

юум. н. 1) харалга, нюдэ табилга, анхаралда дурадхалга, шалган харалга (рассмотрение, обозрение): Портрет, номуудай үзэмжэ байха ёһотой болоно (С. Содномов); ниитын үзэмжэ бүгэдын харалга (всеобщее обозрение): Балтада һургаал болохоор, һэбхи һальхай ябадалыень ниитын үзэмжэдэ табихаб! (Д. Эрдынеев); үзэмжын газар нэрэ суута юумэн, гоё һайхан юумэн, гайхал дурасхалта юумэн (достопримечательность): Басагадни намайгаа Эрхүү хотоёо абаашажа харуулха, үзэмжын газарнуудаар ябуулха, хэдэн хоног амаруулаад бусааха һанаатай ябаһан юм (Д.-Д. Дугаров); сүүдэй үзэмжэ сүүдэй шүүн харалга, шэнжэлэлгэ (судебное рассмотрение); үзэмжэдэ табигдаха анхаралда дурадхагдаха, шалган харахые дурадхагдаха (вноситься на рассмотрение): Мүнөө бодоод үзэхэдэмни, тэдэниие һонирхуулаагүй, һонирхуулхашьегүй асуудалнууд үзэмжэдэ табигдажа, тиимэ суглаануудта эбһээлжэ, һажажа һуулган али олон дайралдадаг байгша һэн (Ц. Цырендоржиев); 2) таалал, ая (усмотрение); өөрынгөө үзэмжөөр аяараа, һанаагаараа (по своему усмотрению); 3) гадаа түхэл, маяг, дүрсэ, дүрэ (вид, наружность): Һалхинһаа харлажа, хаташаһан нюурайнь арһан саарһан мэтээр үзэмжэ муухайгаар хумирба, хуургайтаһан уралынь хахараад, шуһа гараба (С. Доржиев).