ҮРГЭЛЖЭЛҮҮЛХЭ

үйлэ ү., идх. залог саашань ябуулха, орхингүй саашань хэхэ гү, али хэлэхэ (продолжать): Дүүгэйнгээ хэндэ дурлаһааршье һонирхонгүй, Иван алад гаража, саашаа ошоод, хэжэ байһан юумэеэ үргэлжэлүүлнэ (Ч. Цыдендамбаев); – Иигээд лэ хүншни һаладаг, хосордог ха юм даа, – гэжэ доктор Аюуша Ломбые шэртэһэн зандаа үргэлжэлүүлнэ (А. Ангархаев); ажалаа үргэлжэлүүлхэ а) хэжэ байһан ажалаа орхиһон газарһаа дахин эхилхэ, саашань ябуулха (продолжать свою работу): Хүнгэн сарюун зандаа, дуратай ажалаа амжалтатайгаар үргэлжэлүүлжэ, жаргалтай ябахань болтогой! (Ц. Номтоев); б) баруун бур. ажахыгаа ехэ болгохо, үргэдхэхэ (расширять своё хозяйство); замаа үргэлжэлүүлхэ зогсоһон гү, али амарһанай һүүлээр саашанхи замдаа гараха (продолжать путь): Ойн бишыхан горхонһоо уһа уужа, хоол баряад, тэнхээ ороһон бэеэрээ замаа үргэлжэлүүлбэд (Б. Шойдоков); уг удамаа үргэлжэлүүлхэ үхибүү түрэхэ, аша гушатай болохо (продолжать свой род).